Sektori bankar në rritje me 8 për qind, bankat shqiptare zgjerojnë pjesën e tregut
Sektori bankar shqiptar ka vijuar rritjen e qëndrueshme, me aktivet që janë zgjeruar me 8 për qind dhe bankat vendase që fitojnë më shumë terren.
Rritja e aktiveve dhe kreditimit
Sektori bankar ka vijuar rritjen edhe në tremujorin e tretë të vitit, sipas të dhënave të paaudituara të Shoqatës Shqiptare të Bankave, mbështetur në Standardet Ndërkombëtare të Raportimit Financiar. Në fund të shtatorit, totali i aktiveve arriti në rreth 2.222 trilionë lekë, rreth 60 miliardë lekë më shumë se tremujori i dytë, ndërsa rritja vjetore shënoi 8 për qind. Rritja është përqendruar kryesisht në huadhënie: portofoli neto i kredisë arriti 881 miliardë lekë, në rritje me 11.9 për qind krahasuar me një vit më parë. Megjithatë, investimet në tituj mbeten grupi më i madh i aktiveve, me 886 miliardë lekë në fund të shtatorit, në rritje vjetore me 7.4 për qind.
Depozitat e publikut vijojnë të zgjerohet
Rritja e aktiveve është mbështetur nga depozitat, të cilat në fund të shtatorit arritën në 1.85 trilionë lekë, në rritje me 9 për qind krahasuar me vitin e kaluar. Kjo e konfirmon besimin e qëndrueshëm të publikut tek sistemi bankar dhe stabilitetin e tij financiar.
Bankat shqiptare fitojnë më shumë terren në treg
Të dhënat paraprake tregojnë se bankat me kapital vendas kanë rritur pjesën e tregut në 37.6 për qind, nga 36.6 për qind një vit më parë. Kontributi kryesor vjen nga Tirana Bank dhe Credins Bank. Ndërkohë, pjesa e tregut e bankave të mëdha ka pësuar luhatje: BKT ka rënë në 23.9 për qind nga 24.6 për qind, Raiffeisen Bank ka mbetur në 14.4 për qind, ndërsa Intesa Sanpaolo ka zbritur në 9.8 për qind. OTP Albania ka rënë në 8.8 për qind, ndërsa pesë bankat më të mëdha së bashku përbëjnë 73.5 për qind të tregut, nga 74.4 për qind një vit më parë.
Rritje e dukshme për disa banka të mesme
Tirana Bank është rritur në 7.9 për qind të tregut, nga 7.2 për qind një vit më parë. ABI Bank mban 6.9 për qind, Union Bank 5.1 për qind, ndërsa Fibank është rritur në 3.2 për qind. ProCredit Bank ka arritur në 2.4 për qind të aktiveve të tregut dhe UBA vijon të mbajë 1.1 për qind.
